Wat is die storie?

Sebastian werk by die geliefde nuusprogram Blits-Bulletin en sy grootste droom is om die nuus te lees. Wanneer Ben, die veteraannuusleser, skielik sterf, wink daar nuwe geleenthede vir Sebastian en hy volg gretig die leiding van sy held en verbeeldingsmaat Riaan Cruywagen. Maar sy baas, Lorraine, gee die pos vir haar onervare, bedorwe seun, Luan, en gooi Sebastian se planne omver. Hy veg hard om homself as veldomroeper te bewys met die hoop dat hy eendag agter die gesogte nuustoonbank in die ateljee kan inskuif. Hy bevind hom in allerhande interessante situasies saam met JP, die komkommerkoel kameraman; Rudolf die weerman; Andrei, die joernalis en vervaardiger met ’n mansnaam; Luan en Lorraine. Mettertyd beland sy ambisie vir die nuusleserpos – en sy liefde vir sy kollega Andrei – die hele Blits-Bulletin-groep in die sop en hy moet slim dink om sowel die program as sy verhouding met Andrei te red.